KRISMAS ; ENGNGE I NGHAHHLELH CHHAN?
Upa J.Lawmsanga
Tun Inrinni lo awm tur hi Krismas ni a lo ni dawn ta reng mai. Nikum 2020 kha thlir kir ila, nikum ai chuan kan ziaawm hlek dawnin a lang a; mahse zalen taka kum dang anga hman theih a ni rih dawn lo tih chu a chiang reng mai. Kohhran thenkhat an zaikhawm dawn a, thenkhat chu kan zaikhawm rih dawn lova. Kohhran thenkhat chuan ruai an theh dawn a, thenkhat chuan kan theh dawn lo thung. Krismas hi kan nghakhlel viau thin a, kumin chu kan nghakhlel lutuk lo tlangpui a ni maithei. Kum tir atanga nghakhlel taka kan lo thlir, te kan ti thin kha a ni a, KRISMAS HI ENG NGE KAN NGHAHHLELH CHHAN BER LE…?
Naupan lai kha chuan Krismas kan nghahhlelh chhan kha kawr thar, thuamhnaw thar neih leh ruaitheh a ni tlangpui a. Krismas tuka ipkhaia thil thar han dawh thlak te kha nuam kan tih chhan leh kan nghahhlelh chhan a ni bawk. In han chei mawi te, Krismas Card han tar tlar tuar te, khawlai cheimawi han enkual te, Kohhran hrang hrang Biak In chei han enkual te kha a nuam em em a, kan hlimpui hle thin bawk. Tunlai hunah chuan tleirawlte chuan Krismas dawn leh Krismas lai vela Bike leh Car-a han fawr kualte hi an nghahhlelh chhan a ni leh mai em aw. Ruihtheihthil han tih a, han kai ve deuh chhelh a, bialnu te han fawr pui te kha Krismas tinuamtu pakhatah an ngai maithei. Thalaite Krismas nghahhlelh chhan hi dik tak chuan sawi duh hlawm ta se, a Krista lo kher awm asin. Nu leh pate pawh hian Krismas kan nghahhllelh chhan dik tak hi enge ni chiah le? A phawvuak, a behbawm hi kan Krismas nghahhlelh chhan a ni tho angem le? Nikumah Krismas mumal lo takin kan hmang a; inkhawm thei lovin, zaikhawm thei lovin, ruai theh thei lovin, Kohhran hote inhmukhawm thei lovin kan awm a. Krismas hmang lo ang hialin kan inngai pawh a ni maithei. Krismas kan tih lai atak chu enge ni ta ? Inkhawm leh zaikhawm chu em ni Krimas chu? Ruai theh a, khawlai mawi taka chei chu em ni Krismas chu? Hman kuma Traffic Island mawi taka an chei kum khan, naupang tam tak chuan, “Krismas kan en dawn,” an ti a, Traffic Island kha an va en thin a nih kha. Thuamhnaw man to tak tak lei thar hi em ni Krismas chu? Inkhawm bana Krismas thingpui inho lai hi em ni a Krismas lai chu… Krismas thingzar (hmun danga an tih ve ngai meuh loh, kan Kohhranin kan tih thin) naupang puala kan tih thin hi em ni zawk Krismas chu…. Krismas chu a eng lai tak hi nge ni a, nikum pawh khan heng zawng zawng kan tih theih loh vang khan Krismas hmang mumal lo niin kan inngai alo ni em? A eng chu nge Krismas kan nghahhlelh chhan ber chu ni ta le? Ruai theh chu Krismas em ni, ti ila, ni lo ve, Krismas lawmna pakhat a ni kan ti ngei ang a, Inkhawm leh Zaikhawm pawh chu Krismas ni lovin, a lawmna zinga pakhat a ni, kan ti vek bawk ang. Biak In chei te, khawlai leh mahni in kan cheite pawh chu a lawmna chi khat a ni kan ti vek ang a, kawn chei leh thuamhnaw thar neihte pawh chu Krismas behbawm, a lawmna zinga pakhat a ni kan ti ngei ang.
Krismas kan tih tak chu eng hi nge ni a, chu tak chu kan nghahhlelh chhan chu a ni em le?
Mihringin a siamtu Pathian Thu bawhchhia a, Pathian Fa nihna a hloh khan, (Pathian Fa nihna a hloh mai a ni lo, Pathian laka mi bo, chatuan hremnaa kal mai tur a ni tawh). Pathian chuan ama anpuia a siam mihring chu a la hmangaih em em tho va, suala an pil hlen a phal lo va, a Fapa mal neih chhun hmanga chhanchhuah leh chu a kawng awm chhun ani tih hriain, a Fapa mal neih chhun chu khawvel sualah, mihring sual fa anga lokal tirin Chhandamna kawng a rawn hawn tir leh ta a. Chu a lo pianna (leia mihring anga alo kalna), a taksa ngei kan tana hlan a, Nunna chaw/Ruai ni tura a taksa a rawn intheh ral vekna, bul rawn intanna chu Krismas (Krista Ruai) kan lo ti ta a nih hi. A va lawmawm tehlul em!
Heti taka a lawmawm lai hian, hlimhlawp anga lo lawm tur chu a ni lovang a, kut chi khat anga lo hman chi a ni lovang a, ropui taka lo lawm a phu em em lai hian Amah Krista hre chang lo leka lo hman erawh chu a inhmeh hauh lo vang. Kan tana a tuarna leh inpek ral vekna lam hre lo ang hrima khawvel thil hlimhlawp anga kan hman chuan, kan nghahhlelh chhan hi a khawvel riau dawn. Sual laka min chhanchhuaktu tur anih ang tak hian, sual bansanna hun atan hmang ila, Pathian Fa anih ang tak hian Amah chibai bukin a hmaah tlawm takin kun ila, kan tana a inpe ang bawkin a tan inpe thar ve ila, Pathianin a Fapa mal neih chhun min pe anih ang hian, kan neih thil hlan ve ila, Amah Krista tak hi lawm ila, a va tha dawn em. Krismas hi ropui takin lawm thei lo mah ila, I thinlung kha a ni a dil che ni, a tan kawng ilo hawn kha a tawk e. Lal atan lo thlang la, a behbawm mai maiah hian i kal ral lo teh ang u.
Krismas ; Enge i nghahhleh chhan? A behbawm mai mai hi lo nghakhlel lo la, Amah Krista ngei chu i nghahhlelh lo ni mawlh rawh se.