FAPA NGE CHHIAHHLAWH?
THLARAU MI NGE SAKHAW MI?
(Light of Life, December 2016-a Zac Poonen-a ziak lak chhawn)
Sakhaw mi tak, mahni hmasial em em leh mahni tanghma chauh thlir, a hlawkna leh chan tur ringawt thlir a awm theih a. Thlarau mi erawh chuan ama hma chauh thlirin a hma a sial thei tawh lo va, ama hlawkna leh help tur aiin Pathianin engtin nge a hlawk pui ang a, Pathian chu chawimawiin a awm theih ang chu tih a ngaihtuah lian ber a ni tawh thung.
Lalpa tawngtainaah hian, “Kan Pa, van ami..” tih kan chham zawh chiah hian dilna 6 (paruk) kan thlen nghal a. A hmasa pathum chu A (Pathian) hming, A ram leh A duhzawng chungchang thu a ni a. A dawttu pathum chu kan taksa leh nitin mamawh – nitin chaw, sual ngaihdam dilna leh sual laka chhan chhuahna chungchang thu a ni. Lal Isua’n tawngtai dan tur dik tak min zirtirnaah hian Pathian ropuina te, A hming zahawmna te, A duhzawng tih pawimawhna te, A ram chungchang hi kan dah pawimawh hmasa ber tur a ni a, kan mamawh leh duhzawng chu a pahnihna, a hnuhnung zawk tur tih a chiang khawp mai.
Zep miah lovin sawi ta ila, kan tawngtai thin dan hian duh thu a sam loh zia chu a chiang ngawt ang. Chawlhkar khat chhunga darkar tlemte Pathian tan kan hun kan serh hran ve avang te, nun ngil tha pangngaia nunga kan inhriat avanga lo intih thlarau mi ve ngawt hi Pathianin a pawm ang em? tih hi ngaihtuah ngun a ngai khawp mai le. Mahni ngaih that nana sakhaw ngaihsak ve ngawt, thinlung chhungrila mahni in dah lian ber si a awm theih. Lal Isua chuan Luka 9:23-ah nitin a kraws pu a zui lo chu a zirtir a ni thei lovang, tiin a sawi a. “Nangmah i inphat a, Lalber nihna ka chan loh va, nangmah i in tihhlum loh chuan ka zirtir i ni thei lo” a tihna a ni. Chu chu ‘ni tin’ kan tih thin a ngai. “Rawngbawlna” kan tih chi hrang hrang te hi kan thinlunga mahni kan lal ber a, Isua Krista’n lalna a chan si loh chuan sakhaw mi nihna ringawt, thlarau mi nihna a la tling pha tlat lo.
Sakhaw mi rilru-ah chuan Pathian hnen atanga a dawn tur leh a hlawkna tur a lian ber a. Amah in vulh len a, kawng engkima hlawk ber nih a tum fo thin. Thlarau mi erawh chuan a rilru-in “Pathianin keimah atang hian eng hlawkna nge a chan ve ang a, keimah avang hian engtin nge chawimawiin a awm theih ang, ka thih hma hian eng anga nasa in nge Pathian tan ka in sawr chhuah theih ang” tih hi a ngaihtuah lian ber a ni thin. Chuvangin a pawimawh ni ta chu – kan thinlung chhungril berin enge a duhthusam, tih kha a ni a, chu chu Pathianin min teh dan pawh a ni. Kan thil tih ni lovin thil kan tihna thinlung zawk khan sakhaw mi nge ka nih thlarau mi tih chu a hril anih chu.
Adama leh Evi’n an bawhchhiat khan Pathian laka an lan mawi theih nan theipui hnah an insiam chawp anih kha. Theipui hnah hian sakhaw mi nihna a entir a, chu chu Pathian hmaah a tling zo lo. Pathian mit hmuha tling zo zawk chu savun kawrfual zawk kha a ni. Savun kawrfual chuan Isua Krista nihna a entir a, chu chauh chu Pathian pawmtlak a ni zawk. Isua Krista nihna chu Amah Krista’n Pathian rawng a bawlna thinlung ang chiah khan keini pawhin Pathian rawng hi kan bawl tur a ni tihna a ni. Chhiahhlawh ni lovin, Fapa anga rawngbawl tur chuan sakhaw mi nihna ni lovin thlarau zawkin A rawng kan bawl tur a ni.