CHAK LOTE TAN CHAKNA
Chûngte chuan rinnain ramte an la a, thil dik an ti a, thil tiamte an dawng. Sakeibaknei khâ te an tihchihsak a, mei alh hluah hluah te an timit a, khandaiha thah an pumpelh a, chak lo tê ni mah se tihchak an ni a, indonaah chak tak an ni a, hmelma kulh an tichim a. Hebrai 11:33&34
Kum 1929 October thla atanga intanin USA-ah nasa takin sumdawnna a tlachhia a. Chu chu tlakchhiatna rapthlak (Great Depression) an ti a. Kum 1930 chho velah te chuan, mite chu plywood-a sakah te an cheng a. Chutianga an chenna chu an President Herbert Hoover-a hming chawi a “Hoover’s In” tiin an sawi thin a. President Hoover-a hming chu a chhe hneh hle.
Mahse, Hoover-a chu mi hlawhchham pumhlum a ni hauh lo. Thil tha tam tak, ram leh hnam tan a lo ti tawh a. A thunun zawh loh chhiatnain a nang ta a ni. I lo tlachhe hle pawh a ni thei e, hlawhchham kumhlun tur i ni tihna a ni lo.
Abrahama khan Aigupta lal a bum a, bumtu ang ngawta hriat ni ta se engtin nge ni ang. Mosia khan Pathian thu a awih lova, (Numbers 20:1-13) Davida khan tual a that a, a uire a. Heng mite hi sualnaah lo tla lut palh mah se, an rinna avanga fak hlawhte an ni tlat. Chak lo tê ni mahse tihchak an ni. (Hebrai 11:33-34).
I lo tlu tawh a, i chak lo tawh a, i lo mualpho tawh a ni thei e. Inchhira Lalpa pantute chu tihchakin an awm thin a. Hnehtu an lo ni thin.
Hlawhchhamna vâp atangin hlawhtlinna a lo ding chhuak thin.