RINGTU NUNA THIL PAWIMAWH TE
Ringtute he khawvela kan awm chhung, Pathianin a aiawh a min nun tir chhung hian ngaihpawimawh tam tak a awm thei ang a. Mahse, a zawng zawng chuan kan sawi seng lo ang a, kan hre vek seng bawk hek lo. Nimahsela, kan hriat chhunte kan han tarlang ve dawn a ni.
Ani chu tlatlum tur a ni, kei erawh chu lang tur ka ni: Helai thu hi Baptistu Johana leh a zirtir inbiakna a mi kha a ni. Baptistu Johanan Isua chungchanga a zirtirte a chhanna kan hmuh kha a ni. Baptistu Johana kha a hunlaia zawlnei ropui tak Pathian thu tlangaupuitu leh sual simna chanchin au chhuah puitu kha a ni. Mahse, Isuan rawngbawlna a rawn tan khan Johana hriatpuina lem lo (Baptisma neitu anih avangin) khan a rawn baptist ta a ni. Chumi chungchanga Johana’n Isua nihna a sawina kha a ni. Tlatlum tur leh lang tur hi Johana hian a thliar thiam em em mai a. Isua tan leh a hmaa kawngsialtu a ni tih hi a inhre chiang em em mai a. A lawmna pawh Isua khawvel entu turin a rawngbawlna a lo tan ve tak avanga ni tih Johana bung 3 chang 29-ah khan kan hmu a ni. Chutiang tak chuan keini pawh hian tlatlum tur chi leh lang tur chi hi kan thliar thiam ve a tul a ni. Ringtu kan nihna kawngah keimahni nun midangten min hriat sak ve si se lohah hian Krista hi a tlatlum em? Hei hi rawngbawlna rawn intanna bul kha a ni. Thuthlunghlui a puithiamte pawn midangte rawng an bawl sak dawn chuan an inti thianghlim hmasa phawt thin a ni. Keini pawh kan chhungril nunah, kan ngaihtuah duh zawng kan lawm zawngah hian Krista nge tlatluma he khawvel hausakna leh sanna tih hi ngaihtuah tham tak a ni. Mizoram Kristiante-ah hi chuan a tlangpuiin kan chanchin tha hrilh/Pathian thu kan sawiah miten Lal Isua hmel an hmuh theih lohna chhan chu tangka sum ngainatna kan ngah lutuk vang a ni fo thin. Sum chu thawk chhuak turin i bei ang mahse, Isua Krista Chanchin Tha hrilha a hmai ti bal lo turin dik takin buaipui ang che. Dik taka i hausak chuan Isua Krista chu sawichhiatin a awm lo ang. Dik lo taka i hausak erawh chuan Isua hmel tibaltu i ni mai zawk a ni. Isua Krista aiawh tura thlan leh a hmel lanna i nih hi theihnghilh ngai lo ang che. Heng thil hrang hrang nawm chen chaknate, mite tih dan ang awm ve chaknate ilo nei a nih chuan Isua duh dan zawk hi ngaihtuah la, Isua duh dan zawk chu a tlatlum ang a, nangma chak zawngte chuan pahnihna dinhmun an hauh zawk tur a ni. Chutiang bawkin i rawngbawlna ah pawh Isua chawimawi hmasa rawh. Chu chu Pathian lawm zawng tak a ni.
Isua aiawhin kan nung a ni: Lal Isua zuitu i lo nih a. Mahni phak ang tawk tawk a Kohhran bel mi leh TKP vela inhmang mi i nih chuan thusawina hunte, zaina hunte, sharing-na hunte, Bible chhiarna hunte, hnatlanna hunte, thingpui lum hunte ilo nei ve ang. Khingah khian a ni miten chanchin tha an lo hrilh thin. I tum ber chu Isua chawimawi a ni tih hi lantir tum hram hram ang che. Piangtharlo-ah ringawt hian chanchin tha hi hrilh angai a ni lo. Piangthar tawh pawn chanchin tha hi an lo mamawh. Paulan kohhran a din a, Apoloan a chawm sei lian a, an thawhrim ang zel chuan an lawmman an hmu ang tih a ni. Mite Krista bula hruaitu nih hi thil duhawm tak a ni. Chutiang bawkin miten Isua hnung an zui theih nana Isua duhzawngte leh, Isuan nun dan tur min kawhhmuhte Pathian an hmangaih zia an lantir ve na tura hrilh hretu, kawng dik kawhhmuhtu nih pawh hi a pawimawh a ni. Chumi chu i chetze hmangte, i awmdan hmangte hian ilo kawhhmuh ve mai thin a ni. Heng kan nun dan te takte kan fimkhur pui loh vang hian Krista hmel hi kan lo tibal leh thin a ni. Hei vang tak hian a ni, Pathian mi hmanten Lalpa i tello chuan ka nung ngam lo ti a, Pathian an lo auh mawlh mawlh thin. Nang leh kei pawh hian kan phak ang tawk tawkin Isua hmel hi kan pu ve a ni tih hria ila kan nun dan leh ka tawngkamte i fimkhur pui ang u.
Isua i zui anih chuan zui tlat rawh: Rinnaa mi chak zawk ni a i hriatten i pawm loh thil an lo tih vang ngawt a Isua zui thulh thei i ni tawh lo. A tul leh an diklohna chu hmangaihna nen i hrilh ang. Amaherawhchu, Lalpan an hnena a tirh loh che chuan hei hi hre reng la, midang vangin chhandamna i chang lo, amah Isua Krista avang chauhin a ni chhandamin i awm. Chumi avanga nung leh che leh rawngbawl i nih chuan nuam ti tak leh lawm tak chungin TKP-ah pawh rawng ilo bawl tawh ang. Krista Isua rawng chauh bawl turin TKP member-te duhsakna kan inhlan e.