A CHHE LAI SIAMTHA A, MITE TIH HMUH TU
Rbt. K. Zodinsanga
Kum khat chhung zet khawvel pum huap Hripui in min chenchilh ta a. Pathian khawngaihna zarah boruak hrehawm zual pawh a kiang ve ta hret hret niin a lang a. Heng hi ringtute tawngtaina rah pawh ni ngeiin a hriat a ni. Hripui boruak rit takin min delh reng lai mekin thildang boruak duhawm lo tak mai, Ramri buai avangin nasa takin hrek leh dan pin kan han ni lehnghal a. Vawiinah erawh chuan khangte khan min kian san ve ta rih niin a lang. Khang hun chhung zawng khan a hrehawm kan tiin kan pik em em mai a, kan kun tlawk tlawk a ni ber mai. A hrehawmin thleng nawn tawh lo se kan ti vek awm e. Amaherawhchu, khang harsatna hrang hrangte khan thlirna tlang dang atang erawh chuan kan hnam hi zir tur TISA leh THLARAU min hnutchhiah niin ka hria, chungte chu lo thlir ho ila, hmasawnna tur heng atang hian zirho i tum dawn teh ang le. A bik takin ka thalai puite hlawkpui tum leh zual teh ang u.
A hmasa ah chuan Tisa lamah, Inralrinna hun pawh awm miahlo in thla tlemte chhungin Hripuiin khawvel min tuam chhuak a. Thawklehkhatah Ei leh bar ah nasa takin min nghawng nghal a, ramdang atanga kan lak luh thin zawng zawng a tawp a, keimahni kawtkai a kan thar chhuah chhun ang ang pawh seng thei mang lova kan in kharkhip a ngai thin a. Kan ram chu buai namenin kan buai ta nghal a ni. Pawisa Note te chu nei em um mah ila, a lei tur ber a awm si loh chuan pawisa kan neih khan awmzia vak a nei lo. Pathian in ram zau tak mai min pek hi keini hian engah nge kan hman tangkai loh bik em em mai le? Hripui avanga kan chep em em lai te leh ramri buai avanga dan pin kan nih lai khan tute nge thlaphang ve vak lo kan tih chuan, mahni a theih ang anga intodelhte kha an ni tlat asin. Ei leh bar chauh pawh ni lovin, mahni ram theuh kan pan a, ramdangmi ten min hawsan a; hnathawktu pawh chawp lehchilhin kan indaihlo nghal mai a ni. Kan Kohhran Biak In sak lai ngei pawh sak chhunzawm lovin kum khat dawn kan chawl titih nghal ringawt mai a ni. Thildang pawh tam tak sawi tur a la awm ang.
(Tita 2:7,8) Chutiang bawkin tlangvalte chu rilru fel tak pu turin fuih rawh…. engkimah thil tha tih kawngah tihhmuhtuah intilang la, i zirtirnaah chuan i takzia te, i zahawm zia te, i thu sawi dikzia sawisel rual loh te chu tilang rawh. Heng kan sawi tak atangte hian keini ringtu leh Pathian nung betute hian kum khat chhung lek pawhin zir tur kan nei nasa hman hle mai. Khawvela kan awm chhung chuan kan tisa mamawh hi kan hlamchhiah a rem lo. Ei tur mahni kutkawih ngei tharchhuah kawngah te, thildang kan nitin mamawh kan ramchhunga Pathianin min pek haichuah kawngahte kan harh thar a pawimawh tak zet a ni. Tirhkoh Paula anga mahni intodelh chunga ringtu, Pathian rawngbawl leh midangte kawng dik kawhhmuhtu hi kan nih a tul takzet a ni. Heng kawng hrang hrang kan sawi tak ah hian a bik takin keini THALAI (TKP) te hian nasa takin mawh kan phur lehzual a ni. Heng kan ram siamthat a ngaihna kawngah hian keini ringtu Thalaite hian hma kan hruai a, midangte kawng dik kawhhmuhtu kan nih a, kan nuna kan thlan hmasak a va tul em. STK R&D lamin ruahmanna a siam tur, Mistiri Training pawh hi thalai ten i zir chur chur ang u. Mahni Pathian Biakna tur pawh sa thei lo hnam nih reng hi a fel lo a ni.
A dawt leh ah chuan Thlarau lamah; Mizo Kristian te hi a huho a Pathian bia leh inpawl khawm nasa leh ngaina tak mai kan ni a. Biak In leh a vel te leh rawngbawlna hrang hrangte kan ngaisangin thahnem pawh kan ngai thei viau mai a. Kan inaikhawm a, midangte nena in awi nungin, kan hlim thin viau mai. Heng zawng zawngte hi thawklehkhatah hripui avangin tawp vek a lo ngai ta a. Tumah Biakin ah kan inkhawm thei lo, Pastor leh Kohhran hruaitu te, thuhriltu te thuchah kan ngaithla thei ta lo. Mahni chhungkua theuh in kan inbuatsaih a lo ngai ta si a. Chhungkaw tam tak chu tihngaihna hre lo in kan awm chawpchilh ta nghal der mai a ni. Kuminah kan Kohhranin Upa Bial hrang hrangah Survey neih a ni a, Lockdown hnuah Pathianni a chhungkaw inkhawm nei ngai lo pawh keini Kohhranah meuh pawh kan lo tam ta hle mai a. Ram pum huap phei chuan Pathianni a inkhawm nei lo hi chhungkaw engzat tak ni ang maw? Hripui len hmaa Biakin lama kal ve zut si, Biakin a inkhawm theih loh ruala chhungkua a Pathian chibai buk hleitheilo nghal mai ringtu kan nih chuan tu mawh nge ni ta ang le ? Kan inenfiah a ngai hle mai. Nu leh pa mawh chauh ni lovin Thalaite pawhin nasa takin mawh kan phur a ni. Tuna kan thil tawn aia nasa zawk leh rei zawkte hi lo thleng leh ta se hmachhawn tura kan Thlarau nun pawh kan inbuatsaih nasat lehzual ava han tul tak em. Fakhla ah, “Isua i nei tawh em, in chhungkua in dam em? Muanna i chan theih nan nang leh i chhungte chu chhandamna lawngah hruailut thuai rawh” tih kan hmuh angin midang kutah kei leh ka chhungte thlarau nun hi nghat mai lovin Nu leh Pa leh Thalaite hian bul i tan leh ang u.
A tawp berah chuan Isaia 58:12-a kan hmuh, Tichuan nang chu, “A chhe lai siamthatu,” “Mi awmna tura kawngte siamthatu” an ti ang che. Tih kan hmuh angin kan chhungkua, khawtlang, Kohhran leh kan ram, Zoram tisa leh thlarau a siamthatu kan nih a, kawng dik kawhhmuhtu ni theuh turin keini Kohhran mite hian bul i tan leh ang u.