AMAN MIN HRUAI ANG
Isaia 55:9 “Van khi lei aia a sang zawk angin, ka awm dante hi in awm dante aiin a sang zawk si a, ka ngaihtuahte pawh hi in ngaihtuahte aiin a sang zawk bawk a ni”
Israel faten Kanan an thlen dawnin awmhmun an khuar a, Kanan enthla turin Mosia chuan Pathian hriattir angin hnam sawmpahnih zinga thlahtute zinga Puipa thiau a tir a.
An zinga sawmte chuan an ram va en chu tha lo lamin an rawn sawi ta si a. Israel thlahte chuan Mosia leh Arona chungah an phunnawi leh ta a, an Pathian pawh an chhuahchhal hial a nih kha. “Aigupta ramah khan Pathianin min tihlum then sela aw” an ti.
Enthla tura kal zinga sawm chu Pathian lam thlir lo a anmahni hrehawmna leh beidawnna thlir a, Pathian thutiam ringhleltute an ni a. A ram pek tur chanchin a tha lo zawnga rawn sawi a, harsatna thleng tur leh a hrehawm dan turte rawn sawitute chu Lalpa hmaah hriin an thi anih kha.
Pahnihte erawh chu a tha zawnga an sawi avangin an thi ve ta lo a ni.
Awle, mihringte hian Pathian lam thlir lovin keimahni lam ngaihdan leh duhdan ringawt kan thlir a, chuta kan rilru leh ngaihtuahnate kan nghah chuan Pathian hremna kan tawk ve ang. A theih tawh loh kan tihna hmun atangin min thlir pui ve lo.
Kan nunin rahchhuah duhawm tak a neih a, a tha thei ang ber a kan nun a inherchhuah theihna tura min hruai theihna turin kan thinlungte chu amahah kan nghat hmasa fo tur a ni.