KOHHRANTE HNENA NGENNA
Covid-19 hripui thawh hnihnain India ram leh Mizoram pawh na taka min nuai leh tak avangin Sorkar-in hripui laka kan himna tura SoP a siamte hi thuawih taka zawm theuh turin Kohhran mi zawng zawng kan inngen a ni.
– Mahni ina tawm tlat tur te,
– Thenawmte pawh intlawh lo hram hram tur te,
– Kut sil nguna, hmai tuam tha tlat tur leh midang hlata awm fo tur te,
– Biak Inah a huhova tawngtai tura kal rih lo tur te,
– Covid-19 hripui tuar mek te, Home Quarantine-a awm mekte tana tawngtai zel turin Kohhran member zawng zawngte kan inngen a ni.
sd/-
(LALRINMAWIA)
Secretary,
Serkawn Tualchhung Kohhran
sd/-
(UPA J.LAWMSANGA)
Chairman,
Serkawn Tualchhung Kohhran
LAWMPUINA
Kan member puite Nl. CR.Laldingliani leh Nl Grace B.Lalruatkimi te chu dt.5.5.2021 a Office of The State Project Director, Samagra Shiksha, Mizoram-in Senior Secondary School Lecturer result a tih chhuahah an tling hlauh mai a. Thinlung takin kan lawmpuiin an hna tharte Pathian tihna nena tha taka thawk turin duhsakna sang ber kan hlan e.
Baptist Mipa Pawl chanchin tlangpui
(Dt.4.5.2021, BMP Day pual)
Baptist Mipa Pawl (BMP) hi Thingsaiah May 4, 1980 khan din tan a ni. Chutih lai chuan a hming hi sâp tawngin “Baptist Men’s Fellowship” tih a ni a. A lam a har deuh avangin 1983-ah “Baptist Mipa Pawl” tia thlak a ni. BCM Assembly 1988 chuan BMP hi Kohhran hnuaia Fellowship pakhat ni turin a lo pawm ta a. Chuta tang chuan Tualchhung Kohhran hrang hrangah din phal a ni ta bawk a. Assembly chuan BMP Inkaihhruaina Dan ruahman chu a pawm nghal bawk a ni. BCM Assembly 2006 chuan BMP din ni atan Thingsaia a din tan hun 4 May 1980 chu BMP Day atan a pawm a, chuta tang chuan kum tinin BMP Day hi hman thin a ni ta a ni.
BCM Assembly 2011 chuan BMP chu Tualchhung Kohhran bakah Pastor Bial tina din a lo phalsak leh ta zel a. Tichuan, Pastor Bial tam takah din a lo ni ta zel a, a lawmawm hle. Tunah chuan hmun tam takah Bial BMP Inkhawmpui leh rorelte pawh neih thin a lo ni ta. Bial hrang hrang atangin BMP ram pum huap inkhawmpui nei tura dilna a lo lut a. FOD Committee chuan ngun taka a ngaihtuah hnuah, tum khatna atan 2014-ah meet nei turin Central Committee-ah thlenin phalsak an ni a. Hlung takin August 8-10, 2014 khan BCM Bazar veng Biak inah ram pum huap BMP Meet a vawikhat nan neih a ni. BMP tan kum chhinchhiah tlak ‘mellung’ a ni reng tawh dawn a ni.
Tun dinhmunah hian BMP member hi 15,883 an awm mek a ni. Chhungkaw Pa berte an nih avangin BMP hi an pawimawh tak meuh a. Kan ram leh Kohhran kalphung leh sukthlek hi kan ngaihpawimawh zawng hian kan hriat loh hlanin thui tak a hril a ni. Kan nupui fanaute hian pain thil tha leh tha lo hriaah min ngai tlat a, inkhawm kan ngaihpawimawh leh an ngaipawimawh ve mai a. Kan inthlahdah leh chuti tho. Kan pawimawh a ni tih hi i theihnghilh lovang u.
BMP Din chhan
Baptist Mipa Pawl hian dihchhan leh thiltum mumal tak a nei a, chungte chu :-
Baptist mipate thlarau nun buatsaih leh tihchak.
Kristian chhungkaw din.
Kohhran tana kutke tangkai nih.
Khawtlang thatna tura thawh.
BMP Thuvawn
BMP chuan thuvawn a nei a, hetiangin:
“Kei leh ka chhungte erawh hi zawngin Lalpa rawng a nia kan bawl dawn ni”. (Josua 24 : 15b).
THUHLA
⇒ Pathian ram thilpek thawhlawm chhiar hun hi dt 16.5.21-a chhiar tura tih a ni a. Mahse kan veng Covid boruak thar avangin a chiang rih ta lo khawp mai. Hei hi rel thata la puanzar that leh tur a ni e.
⇒ Dt.4.5.2021 (Thawhlehni) kha Baptist Mipa Pawl (BMP) din champha phak vawi 41-na a ni a. Kumin BMP Day thupui chu “Thlen chin atanga hmasawn zel” ( Philippi 3 : 16) tih a ni. Kumin BMP Day hi Covid-19 hrileng avangin Sawrkar-in inkaihhruaina a siam angin Inkhawm leh punkhawm khap a ni a. BMP Day lawmna leh programme duan sa te pawh hman theih a ni ta lo a ni. Planning Commission vawi 5-na ruahmanna ang in kumin 2021 atang hian Mizoram Pum huapa inthlunkhawmna “Mizoram BMP” chu kalpui tura ruahman a ni bawk a. Secretary hran neiin, ram pum huapa rorelna pawh neih thin a ni tawh dawn a ni. 2020-2021 BCM Statistics-in a tarlan dan in tunah hian BMP member 15,883 an awm mek a ni.
⇒ May 10-16, 2021 chhung hian Kristian Chhungkaw Chawlhkar hman tur a ni a. Thuzir bu in tinah rawn sem a ni ang. Thuzir bu hi Rev. C.Lalhungliana ziak niin, Kristian chhungkaw chungchang zirlai 5 a awm a ni. Chhung tinin hlawkpui ngei tura zir kan tum dawn nia.
⇒ Tunkar Thawhlehni, May 4, 2021 khan Administrative Committee Meeting, Sap Upa leh Pu Buanga Hall, Serkawn-ah neih a ni a. Thurel langsar zingah Covid-19 hrileng-in zual lam a la pan zel avangin thu leh awm hma chu Kolkata, Shillong, Aizawl leh Lengpui a BCM Gueast House-te chu mikhual thleng tawh rih lo tura khar rih ni se a ti a, Covid-19 dona atan cheng nuai 10 (10,00,000/-) Mizoram Sorkarah pek turin a rel a, Finance Department bawhzui tura dah nghal a ni.
Tawngtaipui ngai te :
* May 3, 2021 (2:00pm vel)- a Covid test-ah Arunachal West Field-a thawktute, a hnuaia tarlan te hi an positive tih hmuhchhuah a ni e. I tawngtaipui ang u. Rev. Lalbiakhlua Chawngthu (F/D), Isaak R. Chinzah, R. Lalrochangi, Lalhlutzuali Hnamte, Vanlalpeki, Lalhnehpuii, Hani, Jakob Lalchhandama.
* Rev. V.Lalthlamuana hi hma a sawn lo rih khawp mai. A la tho harh peih meuh lo a. Dialysis pawh tunkar chu an ti ngun tlat mai. Tawngtaipui a ngai hle a ni.
* C.L. Remruata s/o Rev.C Ngurhnema chu hma a sawn ve hlek hlek zel e. A khuh pawh a hma aiin a zia. Khawsik pawh a nasa lo e. A oxygen level a la sang thei meuh lova oxygen pek reng a la ni. Remdisivir pek chhunzawm bawk a ni. I tawngtaipui chhunzawm zel ang u.
* Vanduaithlak takin kan veng pawhin Dt. 5.5.2021 khan positive confirm mi 7 leh home quarantine ngai chhungkaw engemaw zat kan nei a. Positive-te an lo dam leh thuai theih nan leh quarantine-te pawhin result lawmawm tak an neih nan i tawngtaipui ang u.