BCM Assembly 2015 Thlirletna
Mizoram Baptist Kohhran Rorelna sang ber – BCM Assembly vawi 119-na, March 4-8, 2015 chhunga BCM Biak In, Farmveng, Lungleia neih chu tluang takin nizan khan an tiak ta. Hriat theih chianah Rorel Palai inziaklut zat chu – 938 niin Zaipawl member leh chhimtu dang chhiar tel an ni lo a, a dawltu veng – Farmveng-a mikhual riak lut zat hi 542 an ni.
Assembly chhung hian zantin Vantlang Inkhawm neih thin a ni a, Assembly thupui – “Kohhran Nung” tih chu thupui thensawm hrang hrang hmangin thuchah ngaihthlak thin a ni. March 8, 2015 (Pathianni) chawhma inkhawm-chu Ordination Service atan hman a ni a, hetah hian Minister 6 (Pastor 5 leh Missionary 1) ordain niin Rev.C.Ngurhnema, BCM President-in a nemnghet.
March 5-7 (nithum chhung) chhun lama Assembly rorel Inkhawm neih thin a ni a. Kumina Assembly Rorel thu passed langsar zual zingah – “BCM hian ram pum huapin Environment humhalh kawngah hmalak te, Family Planning Programme-a Birth Control kalpui danah Pathian Thu zirtir dan mila inzirtir te, Pastor Bial thar 2 hawn belh te, Post thar 13 hawn te, Kum 2015 ah rampum huapin, kan ram tan chaw nghei tawngtai nilenga neih te, zuk leh hmuam do kawngah tun aia nasa zawkin hma lak te niin, 2015-2016 Budget atan Rs.633,116,700/- pawm a ni a. Kum 2008 Assembly-in Pastor Nupui Sawrkar hnathawk mekte, Kum 2015 atanga bang tura thu a lo dah tawh tih danglam rawtna erawh chu hnawl a ni. Kum 2016 BCM Assembly chu Hnahthial Bazar Kohhran-ah nghah niin 2017-ah Lunglei Chanmari Biak inah neih a ni ang.
(Source : Mizobaptist.org)
TAWNGTAI TURA NGENNA
India ram pum huap Baptist Kohhran Thalai inkhawmpui lian, National Baptist Youth Conference 2015 (BYFI Inkhawmpui) chu April 23-26, 2015 chhung hian Serkawn (Lunglei)-ah neih a ni dawn a. He inkhawmpuia tel tur hian Mizoram pawn atangin palai 500 vel lai an rawn in report tawh a. Mizoram chhung atangin kan Baptist unau te bakah MTKP hnuaia bial tin atangin palai 5 zel leh Lunglei khawpui chhunga unit tin atangin palai 10 zel tel tura beisei kan ni. He hunah hian kan mizo mithiam te bakah India ram hmun hrang hrang leh Foreign lam atang pawhin speaker leh resource person tha tak tak te hnen atangin Pathian thuchah leh Zirtirna ngaihnawm tak tak ngaihthlak a ni ang a. Cultural Prog leh Music Festival pawh lian tham taka buatsaih tum a ni.
He hunah hian India rama Kohhran thalai ten thlarau hmun khat atanga hlim leh zalen taka Pathian chibai kan buk a, kan fak-ho theih nan te, inhmelhriatna leh inunauna tha zawk kan neih nan leh thawhhona chak zawk kan neih zel theih nan te, BYFI (Baptist Youth Fellowship India), MTKP leh a dawltu, Serkawn tualchhung Kohhran te pawhin pheikhai rual taka hma an lakho zel theihna atan te, tisa leh thlarauvah malsawmna thar kan chan theihna atan te thahnemngai leh tihtakzeta tawngtai turin Kohhran mipui te leh TKP member zawng zawng te kan ngen a. India rama Kohhran te hian TKP te leh BCM hi min thlir a ni tih hria a, thahnemngai taka tawngtai zel turin kan in sawm e.
Sd/- REV. SAMUEL LALREMSANGA
Organiser, MTKP
Pathianni hmasa, 8th March 2015 khan Gospel Centenary Hall-ah TKP Serkawn Unit te chuan Bial TKP-in ti tura min tih angin kan biak chhunga Home hrang hrang te tanpuina tur sumtuak nan thehkhawm kan nei a. Rs 6640/- lai kan hmu a ni.
Kan Unit in BCM Missionary te kan chawmna, Missionary Support (Faith Promise) chu kumina a vawikhatna atan tunthla hian lakkhawm a ni a, Pathianni hmasa zan khan chhiar fel a ni a. Rs 3850/- lai kan hmu. Rinnaa petu member te inpekna a fakawm hle a ni.
Missionary Support hi sawi tawh thin angin kan unit hian rinnain kuminah Rs 30,000/- (singthum) pe ve turin kan intiam a, member ten rinna nena an inpekna rinchhanin kan intiam a ni. “Lalpa rinchhanin ka lo pe ve ang e” tia envelope lachhuaktute hnenah thla tin kan khawn ang a, cheng singthum tlin hunah kan duh tawk mai dawn a ni a. Member, envelope la lachhuak remchang lote pawhin kan unit Secretary leh Assistant Secy hnenah lakchhuah a pek leh hun atanga chhunzawm ve theih reng a ni tih kan inhriattir nawn leh a ni.
Vawiin hian BCM Biak In Republic Vengthlang, Aizawlah BCM Pastor Bial thar, Republic Vengthlang Pastor Bial hawnna inkhawm neih a ni dawn a. Republic Veng Bialtu Pastor Rev L Vanlalsanga’n inkhawm kaihruaiin Bial thar hawngtu leh thuchah sawitu atan BCM President Rev C Ngurhnema a ni ang. Republic Pastor Bial atanga indang tur Republic Vengthlang Bialah hian Kohhran 5 awmin member 1399 an awm ang.
TKP Serkawn Unit te chuan unit sumtuak nan nimin (Inrinni) khan Tlawng luiah blanket suk hnatlang kan nei a, member kan thawkchhuak tha hle. Tlawmngai taka blanket min suktirtute, lirthei thawhchhuahpuitu leh member hnatlang zawng zawng chungah TKP Serkawn Unit chuan lawmthu kan sawi e.
Kan Unit President Pu K Zodinsanga (Bial TKP Vice President) leh kan unit Treasurer Nl PC Lalhmangaihzuali (BTKP Executive Comittee member) te chu vawiin chawhnu fellowship-ah hian Bial TKP aiawhin Zohnuai East unit tlawhin an fehchhuak dawn a. Kan President hian thuchah a sawi dawn a ni. Kan hruaitu fehchhuak te i tawngtaipui ang u.