Serkawn Pastor Bial Bialtu Pastor Quarter sak hna chu tan a ni ta a. Bazar Shed bul, Pu PT Lalthantluanga quarter thin hmunah khan sak tura ruahman a ni a. Tunkar Nilaini khan Serkawn Pastor Bial BMP te’n a building hlui thiah hnatlang an thawk a, member an thawk chhuak tha hle a ni.
STKP Chapman Colony te chuan tunkar Thawhtanni zing khan Upa C Laldingliana te inah sumtuak hnatlang an thawk a, member an thawkchhuak tha hle.
BCM President Rev C Ngurhnema leh General Secretary Rev H Lianngaia te chu Kohhran programme pawimawhah Manipur-ah an zin chhuak.
TKP Serkawn Unit in kan unit sumtuakna Piggy Bank chu vawiin hi lakkhawm hun a lo ni leh ta. Member te thahnemngai taka pe tura kan inngen rualin Colony hrang hranga bial neitute’n mahni bial theuh khawn fel hman ngei kan tum dawn nia.
Bialtu Pastor Programme
⇒ Good Friday Eve zanah hian BCM Ramzotlangah Lalpa Zanriah
⇒ Good Friday Zing: BCM Zohnuai East-ah sermon
⇒ Good Friday Zan: BCM Zohnuaiah Sermon
⇒ Inrinni Zan: BCM Serkawnah Sermon
⇒ Easter Sunday Zing: Chhawmdawlna Inah sermon
⇒ Easter Sunday Zan: BCM Khawiva ah sermon
KOHHRAN MIPUITE HNENA NGENNA
Ni 23-26 Apreil, 2015 chhung hian National Baptist Youth Conference chu Mizoram Thalai Kristian Pawl in Serkawn Tualchhung Kohhran-ah a thleng dawn a, he Conference hi India ram pum huap a nih avangin India ram hmun hrang hrang atangin Palai engemawzat an lo kal dawn a, tin, Mizoram chhung atang pawhin Palai engemawzat lo kal tura beisei a ni a. Hetah hian Kohhran mipuite mikhual thleng turin kan inngen a, mikhual thleng turin Kohhran mipuite zau taka inhawng turin kan inngen a ni.
Tin, he Conference chhung hian kan in leh a vel leh kan khawlaite fai taka enlkawl turin kan inngen a. Inkhawmpui chhinchhiah tlak kan neih theihna turin leh tluang taka inkhawmpui kan neih theih nan Tawngtaina nen Kohhran hote tan la theuh turin kan inngen a ni. Lalpa’n vengin awmpui zel che u rawh se.
In rawngbawlpui,
sd/-
C. LALTHANTLUANGA
Secretary
Inkhawmpui Organising Committee
Serkawn Tualchhung Kohhran